رديات

[يحيى بن علي العمري]

أعزائي مرتادي منتدانا الرائع ،، نسير المقادير بأحداث تسر أحيانا ، ولا تسر أحيانا أخرى ..
غياهب السجون أخذت مني أعز من عرفت ، وأصبح نادما يتحسر على ما آلت اليه حاله ...
فاخترعت واياه طريقة للتنفيس عنه ، عبر رسائل الجوال و ردياته :

الشيخ شيخ ولو يجي القيد بيده
ماقللت قدره صروف النوايب
ياما حمل غيره سنين عديدة
وارخى لهم من فيض جوده سبايب
وان ضاق حاله ما نقص بل يزيده
جود على جوده رفيع النسايب
يا تاج راسي كلمة لك وحيدة
البدر يظهر واكثر الشهر غايب

[يحيى بن علي العمري]

فرد قائلا :

طال الفراق ومر يوم ورا يوم
والصبر مل ومابقى الا قليله
ياالله تفرجها على كل مهموم
أنته ولي الخلق زانته دليله
البارحة عيني جفت لذة النوم
من هاجس بالقلب مافيه حيلة
ألوم نفسي ماعلى غيري اللوم
ولالي عقب ربي بشر أشتكي له
هذا قدر ربي ولاني بمظلوم
وما قدر الرحمن ماعنه حيلة

[يحيى بن علي العمري]

فأرسلت له قائلا :

ماغبت عنا صورتك عندنا دوم
أنت الدايا ولا سواكم دليلة
والله مامنك خطا وانت محشوم
والكل يشهد لك بحسن الجميلة
يمكن خفوقك من عنا الوقت مضيوم
ومن غيركم يقدر يشيل الثقيلة
خل العتب ياراعي الطيب واللوم
حنا فداك ومالنا عنك ميلة

[يحيى بن علي العمري]

تنهد طويلا ، ثم قال :

عرضت نفسي في حراج الكرامة
لكن ماحصلت من يشتهيها
هذي طريقي ما عليه ملامة
ياما عزيز من العرب مر فيها
وهذي الدنيامثيل الغمامة
يوم تظلك ويوم ما تلتقيها
أنظر لمن حولي أحس السلامة
واقول حظي زين ماطحت فيها

[يحيى بن علي العمري]

يستمر الحوار ، ، ،

مكانتك بين البشر شكلها غير
صرح رفيع كلنا قد سعى له
ماوصله زيد الهلالي ولا الزير
مثل السراب يتعب اللي يخاله
أرجاك من جودك نفايح وتعطير
طيب ومن مثلك ترى الطيب فاله

[يحيى بن علي العمري]

دموعه تغرقه ، و باله المثقل بملايين الهموم تشطح به الى موضوع آخر يلوم فيه من شمتوا به من ضعاف النفوس :

بان الكلام وبان منهو يجيبه
ولو خفي شي يجي يوم ويبين
والنذل يعمل طعنته في قريبه
ويوري انه من خيار المحبين
حكايتي معكم حكاية عجيبة
أضمكم بالحضن وانتوا ثعابين

[يحيى بن علي العمري]

أشد أزره بكلمات مؤيدة لكلامه .. للأسف :

يالله ياخالق صدور رحيبة
ومكون طبع المخاليق تكوين
تكشف هموم سببتها مصيبة
مصيبة في بعض ناس قريبين
أنذال تلقى عندهم كل عيبة
مافرقوا مابين شدة ولا لين

[يحيى بن علي العمري]

أيضا أشد من أزره ...... :


و الله لو تامرعلى الروح تفداك
و اللي رفع سبع بليا عمدها
آمر تدلل حطني عند يمناك
بامشي معك مر الحياة و سعدها
روح على كيفك وانا اشيل ما جاك
وانا لروحك يوم حزنك سندها
ماجيت اهايط للرجاجيل شرواك
إلا صحاح و اقدر اثبت سندها
أناعلى كيفك وخاتم بيمناك
الحارس اللي ليلته مارقدها
أخدمك و اخدم كل من كان يسواك
و لا ظنتي غيرك لدارك ولدها
قدرك عزيزعالي فوق الأفلاك
لك منزلة ما قبلك احد قعدها
من عزتك حتى محلات ماطاك
مسجد لمن قام الصلاة و سجدها

[فهدالخليفي(أبوزيد)]

سبحان الله
ابداعكم ياصاحبي كله ابداع
واللي يحب ابداعكم مايملّه
تقبل مروري

[عبدالمحسن العمر]

سلمت يا علي العمري على ها الرديه الجميله الله يجزاك خير



مشكور يا راس الرجاجيل مشكور

على المعاني والبيوت الجزيله